Jim Paranal on Present Confusion

Jim Paranal of Jimelikula atbp., shares his thoughts on the 15-year old Present Confusion, as part of our first-ever “Review of a Review” series.

Our review of a review series serves to promote other film blogs out there that contribute to the betterment of Film Criticism. Should you want us to feature more, just send us a message on our Facebook page or email us at hello@filmpolicereviews.com

Masayang balikan ang mga blog entries ni Present Confusion. Tulad ng blogger na si Cathy Pena ng makemeblush, hanga ako na pinapanood ni Present Confusion ang mga pelikulang hindi namin inakalang pinalabas sa sinehan o di kaya naman ay maituturing na bad at worst films. Mas kilala naman siya bilang John Tawasil.

Lingid sa kaalaman ng iba, sa larangan ng medisina ang hanapbuhay ni John. Bilang doktor at dalubguro sa larangang kanyang pinili, nakakamangha na nagkaroon ng interes at oras si John sa mga pelikula. Mula sa Philippine Cinema, Asian cinema, Hollywood at foreign films maski ibang genre at filmmaking process ang interes niya. Take note, nagbabayad siya sa sinehan ng mga pelikulang di mo alam kung aabot ng isang linggo o di kaya ay kinabukasan ay maaari na mapull-out ang pelikula.

Noong naging mananaliksik ako sa isang programa sa TV, kapag may ginagawa kami patungkol sa pelikula, ang Present Confusion ang isa sa nagiging source of materials ko. Malaking tulong ito dahil may mga pelikulang Pilipinong mahirap hanapan ng rebyu lalo kung kakaunti ang nakapanood. Kung tatanungin ako sa paboritong blog entries niya ang sagot ko ay ang mga drug-themed films pati ang mga itinuturing na bad at worst films tulad ng Durugin ang Droga, Kamandag ng Droga at The Look-Out. Hindi lamang isang rebyu at kritisismo ang ginagawa niya kundi hinahaluan niya ng humor o katatawanan. Sino ba ang makakalimot sa pagbibigay niya ng kritisismo sa pamamagitan ng paghiga sa sahig o lupa? Natigil lang dahil nagka-pandemya na maski ang mga sinehan at manonood ay naapektuhan. Hindi ko makakalimutan ang mga video essay niya sa Kamandag ng Droga at Echoserang Frog.

Bilang kasapi sa Third World Cinema Club, masaya pag kasama manood si John sa sinehan at pag kasama din ang kanyang kasintahang si Joy. Ilan sa mga hindi ko makakalimutang pelikula na magkakasama kami manood ay ang mga ss.: 2 Cool 2 Be 4gotten, Magic Temple restored version, Ang Larawan, Shoplifters, Come on Irene, Kung Paano Siya Nawala block screening, Jack Em Popoy, Kuya Wes advanced screening at Alone/Together. May mga moments na nagtatawanan kami sa pelikula dahil nag-enjoy kami tulad sa Jack Em Popoy at Magic Temple restored version. May moments na nakikisimpatya kami sa mga tauhan sa pelikula tulad sa Kung Paano Siya Nawala block screening. Merong magkasalungat o magkaiba ang aming basa sa pelikula tulad sa Come On Irene na pinigilan niya ako mag-walk out sa sinehan. Bilang kaibigan, si John ay generous. Mapa-usaping pelikula at medikal. Siya din ang utak sa Third World Cinema Club na ilevel up at magkapodcast. Naniniwala akong malaki ang kontribusyon ni John o Present Confusion sa Pelikulang Pilipino.